CEBU CITY-Human sa 42 ka mga insidente sa sunog sa dakbayan karong buwan sa Abril pa lang, ang Cebu City Government mahimo na lang nga sublion ang panawagan sa mga konstituwente nga magpabiling mabinantayon aron malikayan ang dugang insidente sa sunog ug mangandam sa wala damhang mga panghitabo.
Niadtong Miyerkules, Abril 19, 2023, ang Cebu City Fire Station nitawag sa gidaghanon sa mga insidente sa sunog sa siyudad nga “alarma,” bisan sa wala pa ang ikatulo nga sunog nga miigo sa siyudad sa samang adlaw nga niabot sa 43 ang ihap sa sunog.
Usa ka sunog ang niigo sa usa ka residential area sa Barangay Pit-os alas 8:26 sa buntag niadtong Miyerkules nga miugdaw sa walo ka mga balay.
Gisundan kini sa sunog nga niigo sa Sityo Mangga sa Barangay Mambaling ala 1:46 sa hapon nga niugdaw og 50 ka mga balay ug 80 ka pamilya ang nawad-an ug puy-anan ug gibana-bana nga P3.6 milyones ang danyos.
Laing sunog ang miigo sa Barangay Kalunasan pasado alas 6 sa gabii. Miyerkules.
Ang sunodsunod nga sunog sa dakbayan gitawag nga “alarma” ni Senior Fire Officer 2 Wendell Villanueva, tigpamaba sa CCFO.
Hinungdan nga si Cebu City Mayor Michael Rama, niawhag sa publiko nga magmabinantayon ug magpraktis sa kaluwasan aron malikayan ang sunog, kini giluwatan pinaagi sa Special Assistant sa Mayor nga si Cerwin Eviota.
