CEBU CITY — Naugdaw ang maintenance office ug kantina human nitumaw ang dakong sunog sa sulod sa University of the Philippines (UP) Cebu Campus sa may dalan Gorordo, dakbayan sa Sugbo.
Nakadawat og alarma ang mga sakop sa Cebu City Fire Department ganihang alas-2:57 sa kaadlawon ug giisa kini ngadto sa first alarm.
Matud ni Senior Fire Officer 1 Hermes Molina nga niulbo ang ka’yo sa maintenance office ug nikatap kini sa kantina.
Daling nakalingkawas ang mga nagpuyo sa dormitoryo sulod sa campus sa dihang nakigkumbate ang mga kabumberuhan sa dakong sunog.
Milanat ang maong trahedya sulod sa kapin usa ka oras ug hinimo sa light materials ug concrete ang nahisgutang mga istruktura.
Gibana-banang mokabat ngadto sa P80,000 ang danyos sa sunog diin usa ang na-injure.
Nagpakisayud pa ang mga kabumberuhan kung niulbo ba ang sunog tungod sa electrical ignition.
