LAPU-LAPU CITY,CEBU- Gipasalig sa kadagkoan sa Mactan-Cebu International Airport Authority (MCIAA) nga wala’y nahitabong pagkalangan o pagkabalda sa suplay sa jet fuel, bisan pa man sa padayon nga pagsaka sa presyo niini sa merkado.
Matod pa ni MCIAA General Manager Julius Neri Jr., atol sa pakighinabi niini sa mga sakop sa tigbalita, wala pa siya makadawat sa labing ulahing listahan sa presyo sa lana alang sa ayroplano.
Apan, iyang namatikdan nga ang presyo sa krudo ug gasolina anam-anam na nga mikanaug sa nangaging mga semana, busa nagdepende pa kini sa dagan sa presyo sa lana sa tibuok kalibutan.
Samtang gipasalig usab niini sa publiko nga walay mga flight nga mabalda tungod kay ang Sugbo ang mo-host ug modawat sa mga lider sa estado ug sa ilang mga delegado alang sa ASEAN Foreign Leaders Summit sunod buwan.
Ingun man nga nanawagan kini sa mga biyahero nga magplano daan tungod kay mahimong adunay gamay nga mga pag-adjust sama sa mga pagkalangan sa ilang mga flight, subay na sa naasoyng dakong kalihokan.
