Gipasalig sa Department of Energy (DOE) nga adunay igong suplay sa lana ang nasud ug wala kini plano nga mag-order og dugang nga gasolina sa pagkakaron, bisan pa sa bag-ong pagtaas sa presyo sa mga produktong petrolyo sugod karong Martes, Mayo 5.
Sumala ni Energy Secretary Sharon Garin, dili na kinahanglan ang bag-ong order sa gasolina tungod kay igo ang suplay sa nasud ug limitado ang mga pasilidad sa pagtipig.
Miingon siya nga anaa sa 150 milyon ka litro sa diesel ang naproseso na ug gigamit isip buffer stock.
Gawas niini, gilauman usab nga mosaka ang presyo sa LPG og P1.33 kada kilo karong bulana, katumbas sa P13.42 nga pagtaas sa matag 11-kilogram nga silindro.
Mahitungod sa isyu sa kuryente, miingon si Garin nga gisuportahan sa DOE ang sugyot nga wagtangon ang value-added tax (VAT) sa kuryente aron makunhuran ang gasto sa mga konsumidor, bisan pa nga ang katapusang desisyon anaa sa Department of Finance.
Samtang, gipasalig usab sa DOE nga adunay igong suplay sa kuryente ang nasud bisan pa sa kasamtangang ting-init, ug padayon ang ilang pagmonitor sa demand aron malikayan ang kakulang sa suplay.
