Madayon gihapon ang laing hugna sa “Suroy Suroy Sugbo” nga ipahigayon karong Abril sa isla sa Camotes, lalawigan sa Sugbo.
Kini taliwa na sa kabalaka sa katawhan kalabot na sa posibleng pagkuyanap sa Wuhan coronavirus.
Tungod niini, mipasalig si Cebu Governor Gwendolyn Garcia nga ipaubos gihapon sa screening ang mga balikbayan ug foreign tourist aron masuta kung mibyahe ba sila sa China o aduna bay sintomas sa novel coronavirus.
Matud ni Garcia nga walay angayang ikabalaka ang katawhan gumikan kay prohibited na man ang mga langyaw nga turista kinsang mibyahe gikan sa China sulod sa nakalabay nga 14 ka adlaw.
Gisiguro sa Provincial Government nga luwas ang pagpahigayon sa Suroy Suroy Sugbo sa Camotes Island karong Abril 25 ngadto na sa 26.
Nasayran nga ikaduha ang mga Insik sa labing daghang mga turista nga mibisita sa Sugbo sa tuig 2018.
