Nagpahigayon og surprise drug testing ang mga personahe sa regional offices sa Philippine Drug Enforcement Agency (PDEA), Land Transportation Office (LTO), Land Transportation Franchising and Reguatory Board (LTFRB), Philippine Coast Guard (PCG), Philippine National Police (PNP), ug Local Government Units (LGUs) ngadto sa Cebu North ug South Bus Terminals kagahapong adlawa sa Lunes, Marso 30, 2026.
Kini nga aksyon kay kabahin sa “Oplan Harabas” sa mga awtoridad sa pagpugong sa mga indibidwal sama sa mga konduktor, terminal staffs ug ilabi na sa mga drayber sa pampublikong sakayan nga magmaneho samtang impluwensyado sa ginadiling droga.
Sa pakighinabi sa Bombo Radyo Cebu News Team kang Ahmed Cuizon, ang Administrator sa Cebu North ug South Bus Terminals nga gidumala sa Kapitolyo sa Sugbo nga matod pa tinarong ang tinguha sa ilang kooperasyon sa mga unipormadong personahe sa pagsuta kung nag-positibo ba sa ginadiling droga ang dakong bahin sa mga trabahante sa terminal ug transport companies.
Samtang sa habig sab sa PDEA-7 pinaagi sa pamahayag ni Leia Alcantara, ang Information Officer sa maong ahensya nga ang Oplan Harabas kay multi-agency action isip pagpangandam sa dagsa sa byahedor karong Semana Santa sa pagsiguro nga luwas ang kahimtang sa pangisip ug panglawas sa mga sakop sa sektor sa pampublikong sakayan.
Sa datos nga nahipos sa mga awtoridad, sa North Bus Terminal kay nakapa-drug test ang anaa sa 208 ka mga indibidwal diin usa ka taxi driver ang nasuta nga nagpositibo. Samtang sa South Bus Terminal kay 204 ka mga indibidwal ang nagpa-drug test og walo ang nag-positibo, 3 niini kay mga taxi drivers ug lima ang bus drivers.
Sumala sa PDEA-7, ang mga nagpositibong indibidwal kay i-refer sa mga LGUs alang sa ilang rehabilitation assessment para sa tukmang interbensyon.
