CEBU – Ni-surrender na sa Compostela Police Station ang usa ka Security Guard nga wanted sa pagpusil-patay sa usa ka babaye sa lungsod sa Compostela niadtong Lunes sa gabii, Marso 14, 2022.
Gisaysay ni Patrolman Renan Relampagos ang Desk Officer(DO) sa Compostela Pulis Station atul sa pakighinabi niini sa Bombo Radyo Cebu nga pasado alas 7:20 sa gabie ni surrender ang suspect nga si Anthony Ternate, 40, ug nagpuyo sa maong dapit.
Dugang pa ni Patrolman Relampagos nga nagpatabang ang suspect sa kapitan sa Barangay Canamucan ug sa mga kabanay niini,ug nipirma kini ug extra judicial confession, nga miangkon nga siya ra ang naghimo sa krimen nga nahitabo sa Barangay Canamucan niadtong Lunes sa buntag nga hinungdan sa pagkapatay sa biktima nga si Niña Cadungog.
Subay kini sa taho nga gisikop ang iyang asawa nga si Madelyn nga gikonsiderar nga ‘accessory’ sa krimen human giingong wa niya pugngi si Anthony sa pagpusil kang Cadungog.
Mahinumduman nga gipusil sa suspect si Cadungung ug makatulo ka higayon sa managlahing bahin sa iyang lawas ug dead on the spot.
Dugang pa niini nga na-dismiss na ang kaso sa asawa ni Anthony tungud sa gihimomg extra judicial confession ni Anthony sa niaging adlaw Martes, Marso 15.
Wala pa makuha sa kapulisan ang .357 revolver nga gigamit sa suspek sa pagpusil sa biktima.
Kasamtangang gitanggong sa Compostela Police Station ang suspek ug mag-atubang og kasong murder.
