BALAMBAN CEBU- Padayon pa nga gipangita ang lalaki nga maoy nidakdak og barbell sa ulo ug nidungab sa usa ka poultry boy, hinungdan sa iyahang kamatayon sa Red Cave Poutry Farm sa Brgy Biasong, lungsod sa Balamban niadtong Dominggo, Septiyembre 22, 2024.
Giila ang biktima nga si Marjun Andaya, hingkod ang panuigon, ulitawo, stay-in sa farm ug lumad nga taga Negros.
Samtang ang suspek mao si Wenbie Delima, hingkod ang panuigon, laing poultry boy ug taga Tabango, Leyte.
Sa pakighinabi sa Bombo Newsteam kang Police Lt. Col. Julius Garcia, hepe sa Balamban Police Station, gitino niini nga personal grudge ang motibo sa krimen.
Dugang pa, nga basi sa dagan sa ilahang imbistigasyon ilahang nasuta nga ang biktima og suspek pulos hubog kay gikan nagtagay sa disco sa usa ka lugar sa Brgy. Biasong ug buntag na nanguli dihang nagkalalis gumikan sa ilahang kahubog.
Ang ilahang panaglalis nisangpot sa pagsinumbagay, nisuway ang mga kauban sa trabaho sa pagbabag sa suspek apan gipanghulga sila.
Dinhi, nikuha og barbell si Delima ug dayon sa pagdakdak niini kang Andaya, wala pa makontento ang suspek og gidunggab pa kini niya gamit ang kitchen knife sa makadaghan nga higayon.
Sumala ni Garcia, nga ang suspek paspas nga nakasibat ug sa ilang follow up operation, naka-uli na sa Tabango, Leyte.
Hinungdan nga nakig-alayon sila sa Municipal Police Station sa Tabango sa Probinsya sa Leyte.
Daling nihimo og aksyon ang kapulisan sa Tabango, Leyte, apan ang suspek abtik nga nakasibat palayo sa lugar.
Gibutyag ni Garcia, nga si Delima adunay pending nga warrant of arrest sa kasong murder sa Tabango, Leyte ug kasong pagpangawat sa Bacoor, Cavite.
Nakuha sa kapulisan gikan sa crime scene ang usa ka kitchen knife ug usa ka barbell.
