CEBU – Mudawat na pagbalik ug mga egg products ang Sugbo, bisan pa man paglugway sa 45 kaadlaw nga ban sa maong produkto.
Gitino ni Dr. Jessica Maribujoc, ang head sa Department of Veterinary Medicine and Fisheries, nga mudawat na ang Sugbo ug egg products ilabi na ang balut, apan adunay gikinahanglan nga mga rekisitos, gawas sa veterinary health certificate ug shipping permit, kay aduna na’y ultraviolet certification gikan sa ‘origin’ sa produkto, ingon man nga na-disinfect gamit ang aceptic acid.
Matud ni Dr. Maribujoc nga gikinahanglan sa gihapon ang pipila ka mga inspeksyon una nga makasulod sa Sugbo ug ma-display sa mga kamerkadohan ug supermarkets.
Samtang, gipahibalo usab niini nga aduna sila’y nakumpiskar nga mga baboy ning bag-ohay gikan sa usa ka ihawan nga walay meat inspection permit, ingon man nga hilabihan ka hugaw ang area, diin makamugna ug ka delikado sa panglawas sa tawo gumikan kay ikunsumo man kini.
Hinuon, gitataw ni Maribujoc nga ilaha na kining na ‘incinerate’ o nasunog, butang nga ilahang pagabuhaton kung aduna sila’y makumpiskar.
