CEBU CITY — Nag-una ang probinsya sa Sugbo sa labing daghang mga namatay sa sakit nga dengue sa tanang mga probinsya sa Central Visayas diin adunay koneksyon sa nasinating huwaw.
Base sa datos gikan sa Department of Health (DOH)-7 sukad niadtong Enero 1 hangtud July 13, nag-una ang Sugbo diin aduna kini 5,935 ang dengue cases diin 36 niini ang namatay.
Gisundan kini sa Bohol diin adunay 1,816 dengue cases ug 19 niini ang namatay. Anaa sa 1,759 ang natalang dengue cases sa Negros Oriental diin pito niini ang namatay, samtang 84 ang nataptan og dengue sa Siquijor apan walay namatay.
Sa kinatibuk-ang rehiyon, anaa na sa 9,594 ang nataptan sa sakit nga dengue ug 62 na niini ang namatay.
Nagkanayon ang report sa National Disaster Risk and Reduction Management (NDRRMC), anaa sa ika-3 ang Central Visayas sa mga rehiyon nga adunay taas nga kaso sa dengue.
Tungod niini nakita ni Dr. Shelbay Blanco, OIC sa DOH-Regional Epidemiology and Surveillance Unit (RESU), nga sa mas uhaw ang mga lamok ug mas paspas ang pagdaghan sa dengue sa panahon sa El Niño.
Apan gitataw niini nga taas na daan ang kaso sa dengue sa pagsulod sa El Niño phenomenon.
Matud ni Blanco nga angayang magmatngon ang publiko sa nagkataas nga kaso ilabi na gideklarar sa ahensya ang national dengue alert.
Samtang mitino usab si Blanco nga wala pay nadiskubrehan nga tambal batok sa dengue.
Kini sukwahi na, matud pa, sa pagtuo nga giingong makatabang ang dahon sa tawa-tawa aron momaayo sa sakit nga dengue.
