Gilugwayan hangtod sa Agosto 10 (adlawng Dominggo) ang pagpahigayon sa Tabo sa Kapitolyo 2025 Agri-Fishery Trade Fair sa Cebu Capitol Grounds, Cebu City isip kabahin sa selebrasyon sa ika-456 nga Founding Anniversary sa lalawigan.
Sumala pa sa Facebook post sa Cebu Province Public Information Office nga nag hinungdan sa paglugway sa maong kalihokan kay mao ang mainitong paghangop sa publiko sa mga gipangdalit nga produkto gikan sa mga nagkadaiyang lungsod ug dakbayan sa probinsya.
Pipila sa mga produktong pwedeng mapalit sa Tabo sa Kapitolyo kay mga utanon, prutas, seafoods, mga handcrafted products ug daghan pa.
Nasaksihan niini ang mga delicacies sa mga lokalidad sa Sugbo sama sa Pintos sa Bogo City, Bingka sa Asturias, Budbod Kabog sa Sogod, Suka sa Catmon, Chicharon sa Carcar City, Bisnok sa Dumanjug, Masi sa Liloan, Quesio sa Compostela, Bakasi sa Cordova ug uban pa.
Abli kini gikan alas 8 sa buntag hangtod sa alas 8 sa gabii o kutob sa mahurot ang suplay sa mga stalls ug booths nga nagpwesto sa maong Tabo.
