Gitambagan sa Taiwanese Government ang mga lungsuranon niini nga likayan ang pagbiyahe sa China ug sa mga teritoryo niini nga Hong Kong ug Macao.
Nunot kini sa mga hulga gikan sa China nga ipahamtang ang silot nga kamatayon sa mga nagsuporta sa kagawasan sa isla nga nagmando sa kaugalingon.
Ang tigpamaba sa Taiwan ug deputy head sa Mainland Affairs Council nga si Liang Wen-chieh mipagawas sa maong pahibalo karong Huwebes taliwala sa nagkadaghang hulga sa China ngadto sa Taiwan nga giangkon niini nga kabahin sa teritoryo niini diin dili kini magpakiluoy nga mogamit og puwersa kon gikinahanglan.
Giklaro sa opisyal sa Taiwan nga wala gidili sa ilang gobyerno ang pagbisita sa nasangpit nga mga teritoryo apan gipahinumdoman niini nga ang mga mobiyahe didto kinahanglang dili mopadayag og political opinion o magdala og libro o mag-post online may kalabotan sa mga butang nga magamit sa authoritarian Communist Party aron mapriso ug malutos sila.
Una sa tanan, gatusan ka libo nga mga lungsuranon sa Taiwan ang nagpuyo sa China o nagbiyahe alang sa negosyo, pagsuroy-suroy o pagbisita sa ilang pamilya matag tuig.
Gi-host usab sa China ang mga lokal nga opisyal sa Taiwan ug mga lider sa oposisyon nga Nationalist Party nga nagbisita sa higanteng nasud nga nagpasiugda alang sa panaghiusa tali sa Taiwan ug China.
