Kinahanglan pa nga moagi sa angay nga proseso sa pagrepaso ang tanyag sa Asian Development Bank nga $1.75 bilyon nga tabang pinansyal ngadto sa gobyerno sa Pilipinas.
Sumala ni Palace Press Officer Undersecretary Claire Castro, ang Department of Finance ang mohimo og pagtuon sa maong tanyag sa ADB.
Kung diin, espesipikong susihon sa DOF ang mga termino ug kondisyon sa pinansyal nga pakete aron masiguro nga nahiuyon kini sa tumong sa gobyerno sa pagdumala sa panalapi ug utang.
Taliwala niini, gipahibalo ni Castro nga ang maong ayuda usa ka dakong tabang nga nagtumong sa pagpakunhod sa epekto sa panagbangi sa Middle East sa ekonomiya sa Pilipinas.
Miingon usab siya nga kini nagpakita sa pagsalig sa mga kaabag sa pag-uswag sa abilidad sa gobyerno sa pag-atubang sa mga hagit sa kalibutan.
