Giakusahan ni kanhi Senador Antonio “Sonny” Trillanes IV ang magtiayong sila si VP Duterte ug Atty. Mans Carpio nga giingong nakadawat og kinatibuk-ang kantidad nga P469 ka milyon gikan sa gobyerno sa China.
Matod ni Trillanes, ang P319 ka milyon niini nga kantidad napunta sa negosyo ni Carpio, samtang ang P150 ka milyon napunta sa foundattion nga gipangulohan sa Bise Presidente.
Gipahayag sa kanhi senador nga kini nagsilbing ebidensya sa suporta sa gobyerno sa China ngadto sa magtiayong Duterte-Carpio, usa ka buhat nga iyang gihulagway nga tataw nga basehan alang sa impeachment, tungod kay gidid-an ang mga opisyal nga adunay taas nga katungdanan sa pagdawat og kwarta gikan sa gobyerno sa laing nasod.
Subay niini, gipahayag sa Malacañang nga ang alegasyon ni Trillanes, nga nag-ingon nga si Bise Presidente Sara Duterte gituohang nakadawat og kwarta gikan sa gobyerno sa China, dili angay nga baliwalaon lang.
Matod ni Palace Press Officer Undersecretary Claire Castro, ang maong butang angay nga susihon pag-ayo kung aduna bay igong ebidensya nga makasuporta sa alegasyon, ilabi na tungod sa posibleng epekto niini sa seguridad sa nasud.
Hinuon, namatikdan ni Castro nga wala pa’y gipagawas nga impormasyon ang administrasyon bahin sa maong butang ug kinahanglan una nga mapamatud-an ang maong alegasyon.
Gihatagan og gibug-aton ni Castro nga kung mapamatud-an nga adunay opisyal sa gobyerno nga midawat og kwarta gikan sa langyaw nga identity baylo sa pagkompromiso sa interes sa nasud, usa kini ka seryosong isyu kalabot sa pagkamaunongon sa nasud.
Gipahayag usab ni Castro nga ang bisan kinsa nga mapamatud-an nga nagtugot o miapil sa maong mga kalihokan kinahanglan nga manubag.
