CEBU CITY — Nagkasinabot ang mga dakbayan sa Sugbo ug Mandaue nga ibalhin ang pagpahigayon sa targeted mass testing ngadto na sa Miyerkules, Mayo 6.
Kini subay na sa nagkasakang kaso sa COVID-19 sa Sugbo diin anaa na sa kapin 1,000, base sa report gikan sa Department of Health.
Una nang midesisyon si Cebu City Mayor Edgardo Labella nga i-postpone una ang pagsugod sa target testing karong adlawa, Mayo 4 human sa ilang meeting kauban ang mga kawani sa Department of Health (DOH)-7 ug ang City Health Department.
Matud ni Labella nga hatagan nila og pagtagad ang mga concerns sa mga barangay sa dakbayan.
Samtang gibutyag usab ni Atty. John Edu Ybañez, ang Public Information Officer sa Mandaue City, nga mosunod usab ang City Government sa maong desisyon.
Matud ni Ybañez nga kinahanglang magdungan ang tulo ka mga dakbayan aron maghiusa sa ilang tinguha nga mao ang paghimo og mga polisiya human sa enhanced community quarantine.
Sigon sa report gikan sa DOH-7, anaa sa 900 ang ihap sa mga natakdan sa COVID-19 sa dakbayan sa Sugbo samtang 89 usab sa dakbayan sa Mandaue.
