CEBU CITY- Nagpahigayon og inspeksyon ang gitukod nga Nuestra Señora del Pilar Complex Rehabilitation and Restoration Task Force sa Sibonga Church sa habagatang bahin sa lalawigan sa Sugbo niadtong Biyernes, Pebrero 21, 2025.
Kini isip kabahin sa pagpauli sa karaang simbahan sa maong lungsod nga hilabihang naguba niadtong Disyembre 2021 sa pagpanghasi sa Super Typhoon Odette.
Ang Task Force kay gipangulohan ni Dr. Jose Eleazar Bersales inubanan sa mga opisyales sa kagamhanang lalawigan,Archdiocese of Cebu ug lokal nga awtoridad sa lungsod sa Sibonga.
Nanghinaot ang maong Task Force sa saktong pagpatuman sa P110-milyones nga restoration project nga gipundohan pinaagi sa nasudnong buhatan sa Tourism Infrastructure and Enterprise Zone Authority (TIEZA).
Kahinumduman nga niadtong buwan sa Enero, ang Kapitolyo pinaagi ni Cebu Provincial Governor Gwendolyn Garcia kay milagda og kasabutan ni TIEZA General Manager Mark Lapid nga naghatag og gahum sa Kapitolyo nga mag-oversee sa proyekto nga nahisubay sa lagda sa historical heritage preservation laws.
