Gisaway sa Alliance of Concerned Teachers – Philippines ang hapit na nga pagpatuman sa Department of Education (DepEd) sa trimester system para sa School Year 2026-2027.
Sa usa ka eksklusibong interbyu sa Bombo Radyo uban ni Ruby Bernardo, National Chairperson sa maong grupo, siya miingon nga nagpahigayon sila og survey sa mga magtutudlo diin nadiskobrehan nga ang maong plano wala moagi sa hingpit nga konsultasyon.
Gipasiugda niya nga wala sila supak sa bisan unsang reporma nga gipatuman sa sektor sa edukasyon apan ang gikahadlokan mao nga adunay dakong pag-adjust gikan sa sistema sa grading, papeles ug daghan pa.
Miingon siya nga kung gusto sa gobyerno nga masulbad ang krisis sa edukasyon, ang pag-usab sa kalendaryo sa eskwelahan dili ang tubag kondili ang dugang nga mga teaching ug non-teaching personnel, mga classroom ug hingpit nga suporta para sa mga magtutudlo.
Miingon siya nga kini kinahanglan nga susihon pag-ayo ug hisgutan pag-ayo kung ang reporma tinuod nga gitinguha sa dili pa ipatuman.
Bag-ohay lang gipahibalo sa DepEd nga ilang gitun-an ang pagpatuman sa sistema sa trimester isip kabahin sa usa ka “holistic approach” ngadto sa mas balanse nga pagdumala sa oras para sa mga estudyante ug mas maayong pagtudlo sa mga magtutudlo.
