CEBU – Wala’y direkta nga epekto ang Super Typhoon Henry sa Sugbo, apan nangandam na ang mga sakop sa Traffic Enforcement Agency of Mandaue (TEAM) sa posibli nga mahitabo.
Gipahibalo ni Edwin Jumao-as, ang executive director sa TEAM, nga nagpatawag kini ug emergency meeting alang sa ilahang preparasyon gumikan kay daghang area ang baha-on sa dakbayan sa Mandaue.
Matud pa, ilaha nang gi-andam ang logistics, mga sakyanan alang sa pagresponde, generators, flashlights ug uban pa nilang gikinahanglan.
Dugang pa niini, ‘automatic’ usab nga ikanselar ang tanang day off sa ilahang mga personnel kung ugaling adunay epekto dinhi sa Sugbo ang maong bagyo.
Gipasabot ni Jumao-as nga nakat-on sila niadtong pagkuso-kuso sa bagyong Odette diin hilabihan lang ang kumpyansa apan miresulta ug grabi nga kadaut.
