Nahinay-hinay na og limpyo ang gibuhat nga temporary waste stockpile area sa Kagamhanang Dakbayan sa Sugbo didto sa Pond A lot sa South Road Properties (SRP).
Sa pamahayag ni Cebu City Mayor Nestor Archival Sr. sa mga tigbalita niadtong Lunes, Marso 16 nga matod pa ang development sa maong dapit kay tungod sa nagdagan na nila nga hauling ug cleanup operation sa nagdam-ok nga basura diin nalabay na kini sa nakontratang landfill sa lungsod sa Aloguinsan.
Gigamit ang maong luna isip temporary waste holding area sa syudad sa nagpadayong krisis sa waste management niini human niadtong Enero 8 nga Binaliw landfill landslide nga mikalas og 36 ka kinabuhi.
Tungod niini, naaghat ang kagamhanang dakbayan ang i-utilize una ang luna sa SRP isip temporaryong transfer area diin matag gabii maundohan kini sa itaganang ilabay nga basura sa landfill sa Aloguinsan samtang nangita pa og alternative disposal facility sa mas duol nga dapit.
Sa pagkakaron, ang basura sa syudad kay ibyahe og kapin 60 kilometros sa lungsod sa Aloguinsan sa habagatang-kasadpang probinsya nga nakapataas sa gastuhon sa waste transport sa sumada nga mulapas sa P1-bilyones.
Gani pasalig ni Mayor Archival nga aktibo silang nangita og mas duol nga landfill nga kalabayan para sa umaabot puhon maminusan ang gasto sa paglabay sa basura ingon man sa ila sab nga tinguha sa minusan ang gidaghanon ng mamugna sa dakbayan pinaagi sa segregation.
