CEBU CITY — Patay sa usa ka tindero human gipusil sa riding in tandem kagabii sa Urgello Street, Brgy. Sambag I, dakbayan sa Sugbo.
Giila ang biktima nga si Judito Amante, 38 anyos, ug residente usab sa nahisgutang dapit.
Matud ni Police Staff Sergeant Ryan Opog, ang desk officer sa Abellana Police Station, nga nagsugba og isda si Amante sa gawas sa ilang panimalay sa wala pa nahitabo ang pagpamusil.
Base sa inisyal nga imbestigasyon, kalit lang nga milabay ang duha ka mga wala mailhing lalaki nga naka-helmet sa ilang motorsiklo dayon og pusil ngadto sa biktima.
Gidala dayon ang tindero sa tambalanan human nakaangkon og mga samad-pinusilan partikular na sa iyang nawong apan namatay kini pagkataud-taod.
Narekober sa kapulisan ang tulo ka kabhang sa wala matino nga armas gikan sa crime scene.
Gibutyag usab ni Opog nga nagpabiling blangko ang motibo sa maong insidente padayon nila kining giimbestigaran.
