Posilbling makapasakaan ug kaso si Cebu City Vice Mayor Tomas Osmeña gumikan sa wala pagbuhat niini sa iyang trabaho isip presiding officer, subay sa nahitabo nga panaglalis niini tali ngadto kang Cebu City Councilor Joel Garganera, atol sa ilang regular session niadtong Martes, Oktubre 13, 2026.
Matud ni Cebu City Councilor Jun Alcover, nga ang gibuhat ni Osmeña, mahulagway nga “very unparliamentary” o sukwahi sa naandan sa usa ka panagpulong hilabi na sa sulod session sa konseho, diin misabat kini atol sa “privileged speech” ni Garganera, mahitungod sa pagpadayag sa iyang baruganan sa pagsulbad sa baha.
Sigon sa opisyal, nga sulod sa konseho, adunay mga rules ug procedure nga angayang sundon kini aron mamahimong ma-organisar ug magmalinawon ang panagpulong sa usa ka konseho, apan sukwahi kini sa gipakita sa Bise-Mayor gumikan kay kalit lang kini nga misabat ug mibundak og dokumento atoll sa speech ni Konsehal Garganera.
Dugang niini, mamahimo nga nakalapas si Tomas Osmeña sa rules and procedure gumikan kay atol sa mismong regular session, wala kini mo-preside sa session taliwala nga siya dapat ang anaa sa posisyon.
Gihimug-atan ni Alcover, nga ang maong mga panaglalis dili maisip nga simple lang nga lantugi tali sa duha ka opisyal, apan dako kini nga hisgutanan maylabot sa pagsulbad sa problema sa basura sa Dakbayan sa Sugbo, nga dugay nang gireklamo sa publiko.
Gibutyag niini nga katungod gayud sa usa ka miyembro sa konseho nga maningil sa gisaad ni Osmeña sa comprehensive plan sa pagsulbad sa problema sa basura, ug angayan lang gayud nga tubagon sa Bise Mayor ug sa Administrasyong Archival ang mao nga hisgutanan.
