CENTRAL VISAYAS-Nasikop sa kapulisan ang usa ka 23 anyos nga lalaki, residente sa Brgy. Kinasang-an ning siyudad sa sugbo, human malampusong nasikop sa joint operation sa Regional Intelligence Unit 7 Metro Cebu City ug mga personahe sa City Mobile Force Company.
Gipanguluhan ni Pltcol. Force Commander Ferdinand Modales Casiano, ang operasyon niadtong Abril 28, 2025, sa Cebu City Jail kinsa nag-atubang ug patong-patung nga mga kaso.
Giila ang maong akusado sa alyas ‘FREDO’, kinsang anaa sa Top 3 most wanted person sa Central Visayas diin gidakop sa kasong murder nga gi-isyu sa Regional Trial Court (RTC) 7, Branch 16, Cebu City niadtong Abril 25, 2025.
Sa pikas bahin, mapasigarbuhong midayeg sa mga sakop sa City Mobile Force Company, si Pcol Enrico E Figueroa, ang Acting City Director Sa Cebu City Police Office, sa ilang walay hunong nga paningkamot ug dedikasyon sa ilang trabaho.
Samtang, gimandoan usab niini ang tanang unit sa kapulisan nga padayon pang palig-unon ang kampanya sa pagpangita ug pagdakop sa mga wanted persons aron masiguro ang mas malinawon ug mauswagong dakbayan sa Sugbo alang sa tanan niining mga lumulupyo.
