CEBU CITY-Gipatuman na ang pagsaka sa presyo sa lana adlaw sa Lunes, Agosto 7, 2023 diin niresulta og dugang nga palas-anon sa mga ‘traditional jeepney drivers’.
Ni-umento sa 4 pesos ang presyo sa lana ug matud pa sa nakahinabi sa Bombo Radyo Cebu ngadto sa usa ka jeepney driver nga si Bobby Infat, dako na nga kibhang sa iyahang inadlaw-adlaw nga kita ang naasoy nga umento.
Dugang pa niini, sa matag 15 ka oras nga pagbyahe matag adlaw mokabat lang sa 400 ngadto sa 700 pesos ang kita ni Infat.
Hinungdan nga bisan paman kuwang ang ihatag nga plete sa pasahero, iyaha na lang kining dawaton arun ipuno sa iyahang inadlaw nga kita.
Samtang, gikuha usab ang habig sa mga pasahero alang sayron ang ilahang opinyon bahin sa posibleng pagsaka sa pletehan.
Sa gisaysay ni Alberto Lerio usa ka pasahero nga niingon wala na kini mahimo ug mosabot na lang sa sitwasyon kung ugaling adunay pagsaka sa pletehan.
Asoy pa niini, nga katungod sa mga jeepney driver nga mo-umento sa pletehan gumikan sa nagkadako nga presyo sa lana.
Nanghinaut si Lerio nga mahatagan og alternatibo ug lig-on nga mga solusyon ang gobyerno alang sa mga apektado nga driver.
