CEBU – Patay ang usa ka habal-habal driver human nga gipusil sa usa ka traffic enforcer sa Tamiya, Barangay Basak, dakbayan sa Lapu-Lapu.
Giila ang biktima nga si Junny Sollano, presidente sa Tamiya Riders Association, taga Humay-Human, Barangay Pajo, samtang ang suspek mao si Rolando Castillas, sakup sa City Traffic Management System (CTMS) nga taga Suba Masulog, Barangay Basak sa nahisgutang dakbayan.
Una niini, gisaysay ni Lapu-Lapu City Police Office Director Police Colonel Lemuel Obon nga daan nang mibahad ang suspek ngadtu sa biktima gumikan niining panag-ilug sa pasahero.
Matud pa nga nagbarug lang ang biktima sa dalan sa dihang kalit nga mi-abut ang suspek ug dayung nagpa-uwan ug bala.
Apan walay swerte ang suspek gumikan kay adunay naka-posti nga pulis sa nahisgutang dapit hinungdan nga napatay usab kini.
Gitataw ni Obon nga nagpaila ang iyahang sakup nga usa ka pulis apan giingung mubunut unta ang suspek hinungdan nga napabuthan kini sa nahisgutang pulis.
Naigu sa luyu nga bahin sa ulo ug sa iyahang tangkugu ang biktima hinungdan sa hinanaling kamatayun niini.
Giingung mikabat sa pito ka buto sa armas ang nadungug sa nahisgutang insidente.
Sa pagkakarun, gisuta sa kapulisan kung aktibo nga sakup sa CTMS ang suspek ug kung nganung aduna kini gihuptan nga armas.
