LAPU-LAPU CITY, CEBU- Wala moapil sa panawagan sa militanteng grupo sa kaulohan alang sa transport strike ang kahugpongan sa drayber ug operators sa Siyudad sa Lapulapu atol sa ikaduhang State of the Nation Address (SONA) ni Presidente Ferdinand “Bongbong” Marcos.
Kini ang gipahibalo ni Lapulapu City Police Director, Coronel Elmer Lim nga nagpadala og suwat ang pederasyon sa transport groups sa Siyudad sa Lapulapu ngadto ni Mayor Junard “Ahong” Chan nga nipadayag nga dili mosalmot sa welga.
Matud ni Col. Lim , normal lang ang dagan sa trapiko sa Lapulapu kay padayon ang biyahe sa mga pampublikong sakyanang pasaheroan.
Gipadayag sa City Police Director nga dako ang pagsalig sa mga drayber sa pagdagan sa Kagamhanan sa Siyudad ug sa Kapulisan hinungdan nga walay bisan usa ka drayber nga niapil sa welga.
