Gimandoan ni US President Donald Trump ang mga negosyador sa Estados Unidos nga dili magdali-dali sa usa ka posible nga kasabutan sa Iran, taliwala sa mga taho nga hapit na mahuman ang usa ka kasabutan aron mahupay ang mga tensyon sa Middle East.
Sa usa ka post sa Truth Social, si Trump miingon nga ang mga negosasyon maayo ug “makatabang,” apan mas maayo nga dili kini dali-dalion tungod kay pabor ang oras sa Amerika.
Dugang ni Trump, ang pagbabag sa Estados Unidos sa mga pantalan sa Iran magpabilin hangtod nga ang bisan unsang kasabutan makompleto, mapirmahan, ug ma-ratify.
Ang pagbabag gipahamtang niadtong Abril 13 human sa nagkagrabe nga tensyon tali sa Estados Unidos ug Iran sa Strait of Hormuz, usa ka hinungdanon nga ruta alang sa mga suplay sa lana sa kalibutan.
Samtang, ang tigpamaba sa Iranian Foreign Ministry nga si Esmaeil Baqaei miingon nga hapit na sila makaabot sa usa ka “framework agreement” nga gilangkoban sa 14 ka mga probisyon isip kabahin sa mga panagsultihanay sa kalinaw.
Bisan pa niini, ang bag-ong kasabutan wala makalingkawas sa intriga, diin ang pipila ka mga detalye sa posible nga kasabutan nabutyag, nga nakapabalaka dayon sa pipila ka mga magbabalaod ug kanhing mga opisyal sa Washington.
