Nagpasidaan si President Donald Trump sa Estados Unidos nga dili siya magduha-duha sa pag-pangilabot kung ang mga awtoridad sa Iran mopatay sa mga malinawong nagprotesta.
Miingon ang Presidente nga andam ang US bisan unsang orasa.
Wala kini ikalipay sa Iranian Supreme Leader nga si Ayatollah Ali Khamenei, nga nagpasidaan kang Trump nga mahimong mosangpot sa kagubot sa tibuok Middle East kung mangilabot ang US.
Labing menos walo ka tawo ang namatay sa hapit usa ka semana nga malapad nga mga protesta.
Nagprotesta ang mga tawo sa Iran tungod sa nagkagrabe nga ekonomiya sa ilang nasud, lakip na ang pagkunhod sa bili sa Iranian rial batok sa dolyar sa US.
Kahinumduman nga niadtong Hunyo, nagpahigayon ang US og airstrike sa mga nuclear site sa Iran base sa direktang mando ni Trump.
Isip panimalos, giatake sa Iran ang mga base militar sa US nga nahimutang sa Qatar.
