Sikop ang usa ka lalaki nga giingung “tulisan” sa Barangay Pahina Central Cebu City, atubangan mismo sa istasyonan sa Bombo Radyo Cebu, pasado alas 7:30 sa gabie, Hulyo 30, 2026.
Matud ni alias “Tenan” ang usa sa mga Barangay Tanod nga miresponde sa insedente, nga adunay kaso sa pagpanulis nga na report gikan sa mga istudyante sa usa sa mga dagkong eskwelahan sa Sugbo, ang mireport nga nakuhaan og gamit kagahapon Hulyo 29, 2026.
Hinungdan nga ila kining gisusi sa mga CCTV cameras nga anaa sa Barangay Pahina Central og didto nailhan ang dagway sa suspitsado
Sa pag backtracking sa mga awturidad, nakit-an pagbalik ang suspisado nga naglaroy-laroy doul sa gihitaboan sa pagpanulis, hinungdan nga daling miresponde ang mga barangay tanod, inabagan sa mga residente og gibabagan kini nga miresulta sa pagkahiagumog bun-og sa lawas.
Dali usab nga miresponde ang sakop sa kapulisan hinungdan nga nasikop kini ug kasamtangan karon nga anaa sa kustodiya sa mga sakop sa awturidad ang suspitsado.
