CEBU CITY – Gipaubos sa otopsiya ang tulo ka mga napatay nga drug suspects human ang nahitabong shootout sa gipahigayon nga buybust operation sa Sitio Libon, Brgy Guinsay, dakbayan sa Danao.
Giila ang subject sa operasyon nga si Julius Gacita, 42 anyos, ug ang duha ka mga cohorts niini nga sila si Dexter Diango ug usa ka naila nga ‘Edwin’.
Una niini, gibutyag ni Police Sr/Insp Batobalonos, Danao Police chief, sa dihang nahinabi sa Bombo Radyo nga ilahang gipahigayon ang operasyon sa hideout sa subject human ang kapin sa usa ka buwan nga surveillance.
Matud pa sa hepe nga sa dihang gipahigayon na ang transaksyon giingong nabantayan ni Edwin ang presensya sa kapulisan ug kalit niini nga gipa-uwanan og bala ang mga pulis gamit ang KG-9.
Giingong swerte na lang ug walay naigo sa mga operatiba.
Mibalos usab og pagpaboto ang mga pulis nga nahimong hinungdan sa pagkamatay sa tulo ka mga suspetsado.
Nakuha sa mga pulis gikan sa mga suspetsado ang usa ka kalibre .45 nga armas, .357 revolver, KG-9 ug ang 25.48 grams nga shabu nga gibana-banang mukabat sa 400,000 ka pesos.
Nasayran nga dugay na nga gipaubos sa surveillance si Gacita sa wala pa gisuspenso ang operasyon sa kapulisan batok sa iligal nga drogas ug kalit na lang kini nga nahanaw sa dakbayan sa Danao.
Apan giingong sa dihang gisuspenso na ang operasyon sa kapulisan, mibalik si Gacita ug nagpalobo pa kini sa iyahang iligal nga kalihokan.
Giklaro ni Batobalanos nga dili konektado ang mga suspek sa drug lord nga si Alvaro Alvaro alyas Barok.
