CEBU CITY-Naangol ang tulo ka menor de edad nga mga batang lalaki sa disgrasya nga nahitabo sa barangay road sa Calero, Liloan, Cebu.
Sa pakighinabi sa Bombo Radyo Cebu Newsteam kang Police Major Eric Gingoyon, ang hepe sa Liloan Police Station, giila ang mga biktima nga sila si Jonas Pilapil Orocay, 15-anyos, residente sa Purok Camatis, Calero, Liloan, ug ang nag-drayber sa motor.
Samtang ang mga backrider niini nga naangol usab giila nga sila si Vinz Dominic Moreno Pisa ug John Lorence Bulanges Jalang, susamang mga 13-anyos ug residente sa Purok Camatis, Sitio Tagaytay, Calero, Liloan.
Nasuta nga ‘self-accident’ ang nahitabo human nga ni-counter flow sa pikas lane ug nabangga sa punoan sa kahoy daplin sa karsada hinungdan nga natumba ang motor sa dalan ug nakaangkon og mga samad sa lain-laing bahin sa ilang mga lawas.
Dugang pa, nga daling gidala ang mga biktima sa Vicente Sotto Memorial Medical Center arun mahatagan og medikal nga atensyon.
Subay niini, nanawagan ang hepe sa mga ginikanan ilabi na sa Lungsod sa Liloan nga bantayan ug pahimangnoan ang ilahang mga anak nga menor edad nga gidili ang pag-magmaneho og mga sakyanan, gawas nga dilikado kini alang kanila, hugot usab kini nga gidili sa balaod.
