CEBU CITY — Gatusan ka mga pamilya gikan sa tulo ka mga sitio ang apektado human niulbo ang sunog kagabii sa Sitio Sario, Brgy. Bulacao, dakbayan sa Sugbo.
Naugdaw sa dakong kalayo ang dili moubos sa 50 ka mga panimalay gikan sa Sitio Siwac, Upper San Roque, ug Upper Sario diin pulos kini mga hinimo sa light materials.
Nadawat sa mga kabumberuhan ang alarma sa takna nga 8:53 sa gabii ug giisa kini sa third alarm pagkalabay sa halos tunga sa oras.
Gisubay karon sa mga kabumberuhan kung tungod lang ba sa nagsiga nga kandila ang hinungdan sa dakong sunog diin nagsugod kini sa panimalay nga gupanag-iya ni Lolisa Cabaluna.
Hinuon napawong ang dakong ka’yo human sa dul-an duha ka oras nga pagpakigkumbate diin nagtinabangay ang mga fire stations gikan sa kasikbit nga mga lugar.
Matud sa fire investigator nga si FO3 Emerson Arceo nga gibana-banang mikabat ngadto sa P400,000 ang natalang danyos sa maong sunog.
Hinuon walay namatay apan daling nahatagan og first aid ang upat ka mga indibidwal diin sagad kanila naglisud sa pagginhawa gumikan sa kabaga sa aso.
Kasamtangang namahuway ang mga apektadong residente sa Bulacao Community School ug nahatagan sila og pasiunang hinabang gikan sa Cebu City Government.
