CEBU CITY-Napasang-atan na og kaso ang tulo ka identified suspects nga nalambigit kauban ang usa ka incumbent nga Barangay konsehal sa Barangay Tapon, lungsod sa Dumanjug sa pagpang-harass sa pipila ka mga residente sa maong Barangay bisperas sa mismong adlaw sa piniliay sa milabay nga Dominggo, Oktubre 30, 2023.
Mao kini ang gibutyag ni Police Captain Jan Ace Layug, ang Hepe sa Dumanjug Police Station.
Matod sa opisyal nga lakip sa mga gipasakang kaso mao ang mga kasong attempted homicide, ug ingon man grave threats, nga parehong mga bailable nga mga kaso ngadto sa Cebu Provincial Prosecutors Office.
Wala pa hinuon matino kung kanus-a mamahimong palutsan og warrant of arrest ang mga suspetsado gumikan kay hatagan pa sila og kahigayonan sa piskaliya nga makatubag sa ilahang mga giatubang nga kaso.
Sa pikas nga bahin, upat kabuok biktima ang gitaho sa mga kapulisan nga nagpaluyo sa pagsang-at sa mga naasoy nga kaso.
Gitataw ni Police Captain Layug nga ang maong mga biktima adunay gihuptan nga mga witnesses hinungdan nga malampuson kini nga nakapasang-at og tukmang kaso ngadto sa mga suspetsado.
Sa pagkakaron, nagpabilin nga adunay kahadlok ang mga biktima sa seguridad sa ilahang kinabuhi, gani, gikabutyag sa usa sa mga biktima nga daw gihatagan sila og ikaduhang kinabuhi gumikan sa “traumatic” nila nga nasinatian sa kamot sa mga suspetsado.
