Mopadala ang gobyerno sa United Arab Emirates (UAE) og emergency relief sa mga komunidad nga naapektuhan sa magnitude 6.9 nga linog sa Sugbo.
Ang Emirates News Agency (WAM) mitaho nga ang dinalian nga humanitarian aid gipaagi sa UAE Aid Agency sa koordinasyon sa mga hingtungdan nga lokal nga awtoridad.
Ang mga hinabang naglakip sa paghatod sa lain-laing mga suplay nga mag-complement sa gihatag sa gobyerno sa Pilipinas sa paningkamot nga minusan ang epekto sa katalagman.
Mismong si Dr. Tareq Ahmed Al Ameri, ang chairperson sa UAE Aid Agency ang nagpasiugda sa papel sa pag-pioneer sa UAE sa humanitarian relief, ilabina sa paghatag ug hinanaling tabang sa mga tawo nga naapektuhan sa mga katalagman sa kinaiyahan.
Ang UAE usa sa mga langyaw nga gobyerno nga nipakatap sa nagkalain-laing matang sa humanitarian aid human sa grabeng linog nga nipatay dili muinos 72 katawo sa Central Visayas.
Sa sayo pa, ang Singaporean Red Cross ug ang gobyerno sa Japan mipahibalo na sa ilang suporta alang sa dinalian nga mga panginahanglan ug pagdala sa mga hinabang sa Sugbo.
