Nagpahigayon ang mga drone sa Russia og makamatay nga pag-atake batok sa usa ka grain ship sa Black Sea niadtong Lunes, matod ni Ukrainian President Volodymyr Zelensky, human gitaho sa Romania nga adunay barko nga nasunog ug nalunod duol sa baybayon niini, diin duha ka tripulante ang namatay.
Gumikan sa pag-atake, nasunog ang barko ug nalunod mga 30 ka nautical mile sa habagatan sa pantalan sa Sfantu Gheorghe.
Matod sa mga awtoridad sa Romania, duha ka tripulante ang namatay ug 11 ang naluwas human nasunog ang barkong Royad Mammadov, nga may gitas-on nga 139 metros, didto sa Black Sea, usa ka lugar nga nagkadaghan ang mga pag-atake gamit ang drone taliwala sa gubat sa Russia ug Ukraine.
Gisalbar sa mga awtoridad sa Romania pinaagi sa usa ka helikopter ang 11 ka mga tripulante, diin tulo kanila ang naangol samtang walo ang anaa sa maayong kahimtang.
Matod pa ni Ukrainian President Volodymyr Zelensky, kini usa ka “dautang pag-atake” batok sa usa ka barkong sibilyan sa neyutral nga katubigan, ug kini nagpasiugda sa dinalian nga panginahanglan alang sa aksyon batok sa Russia aron mapanalipdan ang seguridad sa pagkaon sa tibuok kalibotan.
Ang Turkey, pinaagi sa Chamber of Maritime Commerce niini, nagpahayag usab og dakong kabalaka bahin sa kapin sa 226 ka mga pag-atake sa mga barkong sibilyan sukad nagsugod ang gubat, samtang gihulagway ni Presidente Recep Tayyip Erdogan ang maong mga aksyon nga “unacceptable.”
