CEBU CITY — Gikumpirmar sa Department of Health (DOH)-7 nga moabot sa Sugbo ang 20,000 ka mga doses sa AstraZeneca COVID-19 vaccines karong Marso 10 alang sa nagpadayong vaccination rollout.
Matud ni DOH-7 Spokesperson Dr. Mary Jean Lorreche nga gi-andam na sa mga tambalanan ang masterlist sa mga mahatagan sa maong bakuna gikan sa UK ug usa sa mga mahatagan mao ang mga medical workers nga anaa sa 60-anyos pataas.
Dugang pa niini nga ang mahabilin sa gitaganang doses, ipaturok ngadto sa ubang medical workers kinsang mas nipili sa AstraZeneca vaccine.
Samtang gihimug-atan sa DOH-7 nga patas ang pagbahin-bahin sa Sinovac vaccine ngadto sa ubang mga tambalanan sa Sugbo diin nakabase lang kini sa percentage sa mga health care workers.
Migahin ang DOH-7 sa CoronaVac doses ning mga mosunod nga tambalanan: 1,200 doses alang sa Perpetual Succour Hospital; 1,584 doses alang sa Cebu Doctors University Hospital; 2,468 doses alang sa Chong Hua Hospital-Fuente; 1,111 doses alang sa Chong Hua Hospital-Mandaue; 414 doses alang sa South General Hospital; 364 doses alang sa North General Hospital; ug 560 doses alang sa Mactan Doctor’s Hospital.
Hinuon gipasigarbo sa habig sa ahensya nga “on-time” ang pagpahigayon sa vaccination rollout sa bakunang ginama sa China ngadto sa managlahing mga tambalanan sa Central Visayas.
Sa pagkakaron, anaa na sa 2,341 ka mga medical workers sa rehiyon ang naturukan na og COVID-19 vaccine diin 52 niini ang nakasinati og “adverse events” human nabakunahan.
