Nagmalampusong ang unang adlaw sa gipatuman nga Free Ride Program sa gobyerno nga nagsubay sa routang “01K” (Mandaue – Urgello) kagahapong adlawa sa Miyerkules, Hulyo 23, 2025.
Kini ang pamahayag nga gibuhian ni Land Transportation Franchising and Regulatory Board – Central Visayas (LTFRB-7) Regional Director Eduardo Montealto atol sa eksklusibong pakighinabi sa Bombo Radyo Cebu Newsteam.
Sumala pa ni Montealto nga daghan ang nakahimulos sa maong programa sa libreng sakay nga sagad mga estudyante sa mga dagkong tunghaan sa dakbayan sa Sugbo ug manguli sa Mandaue, Consolacion, ug uban pang routa pa norte sa Metro Cebu.
Gani ang maong programa kay gioangunayan og paglusad ni Department of Transportation Secretary Vince Dizon sa iyang pagbisita sa Sugbo kagahapong adlawa.
Ingon man nga kung magpadayon ang kalampusan sa maong programa kay posibling madugangan pa ang routa niini diri sa Sugbo ug mag-agad nalang sa budget gikan sa nasudnong panggamhanan.
Ang inisyatiba sa maong programa kay nanukad mismo sa Office of the President diin ang mga pilot cities kay ang Davao City ug ang Sugbo isip paghatag og solusyon sa nagkagrabeng problema sa transportasyon sa duha ka lugar.
Pasalig niini sa mga drayber ug operator sa maong routa nga dili kini makabalda sa ilang panginabuhi tungod kay tanang rehistradong Modern Public Utility Vehicles (MPUVs) ang misalmot sa programa ug mag-operate lang kini sa limitadong oras sa usa ka adlaw.
