CEBU CITY — Nasikop sa kapulisan ang upat sa lima ka mga suspek sa pagpatay ug paglubong sa usa ka gituohang drug supplier sa dakbayan sa Talisay.
Una niini, giila ang gilubong nga biktimang si Juniel Cabiluna, hingkod ang panuigon, human kini nakubkuban sa mga opisyal sa Brgy. Lagtang niadtong Martes, Nobyembre 26 sa kaadlawon.
Matud sa hepe sa Talisay City PNP nga si Police Major Gerard Pelare nga midangop sa kapulisan ang amahan sa biktima alang sa pag-ila sa nakubkubang patayng lawas.
Human misaysay ang usa sa mga nakakita sa maong krimen, daling nasikop ang upat ka mga gitudlong suspek sa pagpatay atol sa ilang hot pursuit operation.
Nakuhaan usab og ginadiling drugas ug dili lisensyadong armas ang mga dinakpan nga silang Junel Bacus, 35 anyos; ug Xavier Cavier, 30 anyos.
Nasikop usab ang uban pang mga responsable nga silang Arwin Calinawan ug Rommel Bacacao, parehong 27 anyos ang edad, samtang gipangita pa usab ang laing usa ka suspetsado.
Gibutyag usab ni Pelare nga gituohang gipatay ug giulubong sa mga dinakpan ang biktimang si Cabiluna human nila kini gitulis.
Dugang pa usab sa hepe nga, matud pa, nagsabot ang mga suspek nga pamatyon ang giingong drug personality aron lang makasuyop.
Mag-atubang ang mga dinakpan og kasong robbery with homicide, ilegal possession of firearms, ug pagpayuhot og ginadiling drugas.
Samtang ikalipay sa Commission on Human Rights (CHR)-7 ang dinaliang aksyon sa Talisay City Police Office diin gidakop dayon ang upat ka mga suspek.
Matud ni CHR-7 Director Atty. Arvin Udron nga kaya kaayo sa mga kapulisan nga makasikop sa upat nga anaa sa drug watchlist nga wala gipangpatay.
Hinungdan nga mipahinumdom si Udron ngadto sa mga kapulisan nga importanteng sundon ang nakalatid sa criminal procedure sa matag operasyon.
