CEBU CITY- Gibadlong sa mga personahe sa Cebu City Police Office (CCPO) ang 18 ka mga street vendor human sa nadawat nga reklamo gikan sa mga motorista mahitungod sa giingong pagpanghasi ug pagpugos kanila sa pagpalit og mga baligya diha sa mga dalan ug intersection sa dakbayan.
Sa operasyon nga gipahigayon kagahapon, Mayo 30, 2026, gi-target sa CCPO ang Gorordo Avenue, dapit sa unahan sa JY Square sa Barangay Lahug, diin kasagarang namatikdan ang maong aktibidad.
Lakip sa mga nabadlong mao ang unom ka babaye ug dose ka lalaki nga gidala dayon sa buhatan sa CCPO alang sa interbyu, validation, ug dokumentasyon aron ma-verify ang ilang identidad ug kahimtang sa ilang pagbaligya sa karsada. Human sa proseso, sila opisyal nga natala sa police blotter.
Gipasidan-an usab sa kapolisan ang maong mga indibidwal batok sa posibleng kahasol, peligro, ug mga aksyon nga mahimong makapahadlok sa mga motorista ug sa publiko.
Human niini, ang 18 ka street vendor gihatod ngadto sa Barangay Lahug Hall kauban ang mga personahe sa Mabolo Police Station (PS4) alang sa dugang koordinasyon ug tukmang pag-atiman sa ilang kahimtang.
Gipahibalo sa CCPO nga magpabilin ang ilang kampanya sa pagmentinar sa kahapsay sa dalan ug pagsiguro sa kaluwasan sa publiko ilabina sa mga dagkong karsada sa Dakbayan sa Sugbo.
