CEBU CITY- Magpahigayon og imbestigasyon ang Commission on Human Rights-7 (CHR-7) sa Cebu City Jail–Male Dormitory human sa kamatayon sa usa ka Person Deprived of Liberty (PDL) nga napalgang patay sulod sa iyang selda sa maong pasilidad.
Ang namatay giila nga si Fernando Abapo Prajes, ang suspetsado sa pagpanglugos sa usa ka 11-anyos nga batang babaye. Nakit-an na lamang siya nga wala nay kinabuhi sulod sa iyang selda niadtong Domingo sa hapon, Abril 26, 2026.
Sa maong panghitabo, nanawagan ang pamilya ni Prajes nga ipahigayon ang autopsy aron matino ang tinuod nga hinungdan sa iyang kamatayon. Nagpahibalo usab sila nga maghulat una sa resulta sa maong eksaminasyon sa dili pa mohatag og opisyal nga pamahayag, bisan pa man adunay mga suspetsya nga posible siyang gimaltrato sa kaubang Persons Deprived of Liberty (PDLs).
Kini ang pamahayag ni Atty. Arvin Odron, Regional Director sa Commission on Human Rights-7, sa pakighinabi sa Bombo Radyo Cebu ug midugang nga mikontak na ang pamilya sa ilahang buhatan.
Sumala sa Regional Director, gi-monitor nila ang insidente isip “death in custody,” tungod kay responsibilidad sa gobyerno ang pagpanalipod sa seguridad sa mga PDL nga ubos sa kustodiya.
Gipasabot ni Odron nga obligasyon sa estado ang pagrespeto ug pagpanalipod sa katungod sa tanang indibidwal, lakip na ang mga napriso, subay sa international standards ug sa Konstitusyon sa Pilipinas.
Gidugang pa niya nga makaduda ang maong insidente tungod kay kinahanglan unta nga luwas ug secure ang mga PDL sulod sa pasilidad sa BJMP.
Gitataw usab ni Atty. Odron nga sa susamang adlaw, nagpadala na sila og team of investigators ug mga abogado alang sa ocular inspection aron makasumite og mga dokumento.
Gisubpoena na usab nila ang Cebu City Jail–Male Dormitory aron isumite ang ilang mga report ug detalye sa insidente.
Sa bahin sa Cebu City Jail–Male Dormitory, nangayo kini og tulo ka adlaw aron mahuman ang ilang kaugalingong imbestigasyon, nga karon gihulat sa CHR ug sa pamilya sa namatay.
Kahinumduman nga si Prajes giakusahan sa sexual assault batok sa iyang 11-anyos nga silingan niadtong Marso 7, 2026. Human sa insidente, miikyas siya paingon sa Alegria, Cebu, ug dayon mibiya paingon sa Negros, ug misakay og barko padulong Manila.
Apan sa dihang nahibal-an sa Cebu City Police Office (CCPO) ang iyang mga lihok, nakig-alayon sila sa Criminal Investigation and Detection Group National Capital Region Field Unit, uban sa Philippine Coast Guard Sea Marshals, Philippine Ports Authority, ug Manila Police District. Kini miresulta sa iyang pagkasikop niadtong Marso 9, 2026, sa pag-abot niya sa Port of Manila.
