Mokabat sa P21.48 milyon nga illegal drugs ang nakumpiska sa Police Regional Office 7 (PRO 7) sa Central Visayas niadtong bulan sa Agosto, diin 821 ka mga suspek ang nadakpan atol sa 753 ka police operations.
Sa maong mga operasyon, lakip ang buy-bust operations, pagserbisyo sa warrant of arrest, checkpoints ug police responses, nakumpiska ang 3,158.05 gramos nga shabu nga nagkantidad og P21,474,719.60, dugang ang marijuana nga nagkantidad og P9,408.
Ang Cebu Police Provincial Office (CPPO) ang nakarekord sa pinakadakong drug haul nga nagkantidad og P5.58 milyon, gisundan sa Mandaue City Police Office (MCPO) nga P4.68 milyon ug Cebu City Police Office (CCPO) nga P3.74 milyon.
Gidayeg ni PRO 7 Regional Director PBGen Arnold E. Abad ang mga police personnel tungod sa ilang padayong kampanya batok sa illegal drug trade ug sa ilang paningkamot nga mapahilayo ang delikadong mga substansiya gikan sa mga komunidad.
Gidasig usab sa PRO 7 ang publiko nga magpabiling alerto ug i-report dayon sa kapulisan ang mga gidudahang kalihokan nga may kalabotan sa illegal drugs.
