Nasikop sa mga awtoridad ang giila nga Top 2 Most Wanted Person sa tibuok lalawigan sa Sugbo pinaagi sa gipahigayong manhunt operation subay sa warrant of arrest nga gipagawas sa korte sa Dakbayan sa Talisay, Cebu.
Ang maong malampusong operasyon gipangulohan sa Joint Tracker Team gikan sa Provincial Intelligence Unit (PIU) sa Cebu Police Provincial Office (CPPO), kaabag ang mga kawani sa Talisay City Police Station.
Ang pag-aresto gihimo human ang suspek gipasakaan og lima ka ihap sa qualified rape, ug basi sa direktiba ug desisyon sa korte, walay piyansa nga girekomenda alang sa iyang temporaryong kagawasan samtang nagpadayon ang husay sa iyang mga kaso.
Subay sa taho sa kapulisan, usa kini ka intelligence-driven operation diin naggamit ang mga opisyal og Alternative Recording Device (ARD) aron masiguro ang transparency ug pagsunod sa gipagawas nga mga lagda ug regulasyon sa Korte Suprema kabahin sa pagsilbi og warrant.
Diha-diha dayon human sa pagkadakop, gipahibalo ug gipasabot sa pulis ang suspek bahin sa iyang mga values ug konstitusyonal nga mga katungod. Sa pagkakaron, ang suspek temporaryong gibutang ug nagpabilin sa Talisay City Police Station Custodial Facility samtang naghulat sa sunod nga gikatakdang proseso sa korte ug legal nga aksyon.
