PROVINCE OF CEBU- Gimandoan ni Cebu Governor Pamela Baricuatro ang Cebu Police Provincial Office (CPPO) nga mopahigayon og mga inspeksyon ug palig-onon ang seguridad sa tanang pampubliko ug pribadong eskwelahan sa probinsya karong Martes, Agosto 18.
Ang mando gisunod human sa bag-ohay nga insidente sa pagpamusil sulod sa usa ka senior high school sa Zamboanga City nga miresulta sa pagkamatay sa duha ka indibidwal.
Giingon ni Baricuatro nga gimandoan niya ang PNP Provincial Director ug ang tanang Chiefs of Police (COP) sa pagpahigayon og security inspections ug pagpatuman sa dugang nga mga lakang sa seguridad sa mga eskwelahan.
Samtang, gimandoan ni Provincial Director Col. Mangellen ang pagdeploy og mga pulis sa mga eskwelahan ubos sa “one-police-to-school deployment scheme,” nga ipatuman hangtod sa city ug municipal police stations.
Gipasiugda sa gobernador nga ang maong mga lakang gitumong aron mapanalipdan ang mga estudyante, magtutudlo ug school personnel ug aron mapugngan ang posibleng mga insidente sulod ug palibot sa mga eskwelahan.
