PROVINCE OF CEBU-Gihingusgan sa Cebu Police Provincial Office (CPPO) ang “Safer Cities Initiative,” diin nanguna kini sa gatosan ka mga taktikal nga operasyon nga nakadakop na og liboan ka mga nakalapas sa lokal nga ordinansa sa tibuok probinsya.
Ubos sa mando ni Provincial Director PCOL Abubakar Udang Mangelen Jr., ang mga yunit sa CPPO nag-deploy og triple-threat strategy, ang OPLAN Sita, OPLAN Bulabog, ug Night Watch Operations aron masumpo ang mga kalapasan batok sa kaluwasan sa publiko.
Ang dungan nga mga operasyon batok sa kriminalidad nagtumong sa mga importanteng kalapasan nga nakabalda sa kahusay sa komunidad.
Kini nga mga operasyon sulod lang sa usa ka adlaw nakasikop og mokabat sa 500 ngadto sa kapin 600 ka mga indibidwal matag operasyon, nga naka-focus sa Public Disturbance, proteksyon sa menor de edad, Public Decency, ug Road Safety.
Gepasiugda ni PCOL Mangelen nga ang gipausbaw nga visibility sa CPPO usa ka tinuyo nga estratehiya aron mapugngan ang mga oportunidad alang sa mas seryoso nga mga krimen sa dili pa kini mahitabo.
Ang lokal nga pagduso direktang nahiuyon sa mga direktiba sa tibuok nasud nga gi-isyu ni Interior Secretary Jonvic Remulla ug nakadawat og pagdayeg gikan ni Regional Police Director PBGEN Arnold Abad ug Gobernador Pamela Baricuatro tungod sa dakong kalamboan sa seguridad sa probinsya.
