Gibutyag sa militar sa US ang malampusong pagpang-atake niini batok sa tulo ka Iranian oil tanker.
Sumala sa US Central Command (CENTCOM), hingpit nilang giguba ang duha sa mga tanker—ang usa nga nahimutang sa Kharg Island ug ang usa sa Strait of Hormuz.
Samtang, grabe usab nga nadaot ang ikatulo nga tanker nga nahimutang sa Gulf of Oman.
Matud pa sa CENTCOM, napugngan usab sa ilang pwersa ang pag-atake sa Islamic Revolutionary Guard Corps (IRGC) batok sa usa nilang US aircraft carrier ug guided-missile destroyer.
Walay namatay o nasamdan sa bahin sa US atol sa maong insidente.
Si Admiral Brad Cooper, commander sa CENTCOM, mipahimangno nga dili sila magduha-duha sa pagbalos batok sa Iran kung atakehon niini ang mga barko sa US.
Ang CENTCOM maoy nagdumala sa mga operasyon militar sa US sa Middle East.
