Naglunsad ang Estados Unidos og bag-ong serye sa airstrikes batok sa mga target sa Iran, lakip ang mga pasilidad sa Islamic Revolutionary Guard Corps (IRGC), samtang misamot ang tensiyon tali sa duha ka nasud tungod sa kahimtang sa Strait of Hormuz.
Sumala sa U.S. Central Command, gipunting sa operasyon ang mga air defense sites, radar systems, maritime assets, mine-laying capabilities, ug communications facilities sa Iran.
Matud sa Estados Unidos, gihimo ang mga pag-atake human sa giingong mga pagsulay sa IRGC nga hulgaon ang commercial shipping sa Strait of Hormuz ug mga sundalong Amerikano nga anaa sa rehiyon.
Sa habagatang Iran, gikataho usab ang pag-atake sa Sirik County sa Hormozgan Province, diin usa ka residential area ang naigo atol sa usa ka kasal.
Sumala sa mga Iranian authorities, labing menos lima ka tawo ang namatay ug kapin 60 ang nasamdan, lakip ang mga babaye ug mga bata.
Gikondena sa Iranian government ang maong pag-atake ug gipahayag sa IRGC nga andam kini nga mobalos batok sa Estados Unidos.
Nagpabiling taas ang tensiyon samtang nagbinayloay og hulga ug pag-atake ang Washington ug Tehran, nga nagpasaka usab sa kabalaka bahin sa posibleng mas lapad nga panagbangi sa Middle East.
