BOHOL-Gimando ni Gobernador Aris Aumentado ang pagpatuman sa hugot nga mga lakang sa seguridad aron mapugngan ang paglihok sa mga baboy ug mga produkto sa baboy gikan sa usa ka baryo sa Pilar diin gikataho ang mga gidudahang kaso sa gikahadlokang African swine fever (ASF).
Matod ni Aumentdao, gipakatap na sa Pilar ang mga police ug military personnel aron motabang sa pagkordon sa lugar samtang ang Office of the Provincial Veterinary (OVP) mikuha og blood samples sa mga patay nga baboy nga gidudahang nataptan sa maong sakit sa hilit nga barangay sa San Vicente.
Sukad niadtong 2019, alerto na ang Bohol batok sa ASF sa tinguha nga magpabiling luwas ang P6-bilyones nga industriya sa baboy sa probinsiya gikan sa makatakod ug makamatay nga sakit nga dala sa baboy.
Gikumpirma sa lokal nga mga eksaminasyon nga ang mga patay nga baboy nataptan og sakit nga viral apan gipaabot pa ang resulta sa confirmatory test nga gihimo sa Bureau of Animal Industry (BAI) nga magdeterminar kon nataptan ba sila sa ASF.
Matod ni Aumentado nga ang resulta gipaabot nga moabot sulod sa maong adlaw.
Ang inisyal nga protocol nga gitakda sa OVP mao ang pagkolekta og mga sample sa dugo sulod sa 100 metros nga radius sa lugar diin nasuta ang mga gidudahang kaso apan gipataas kini ni Aumentado ngadto sa 500 metros.
Matod ni Mayor William Pajo sa Pilar, 10 ka baboy ang nangamatay sukad niadtong Hulyo 19 human nagpakitag mga timailhan sa impeksyon samtang 20 pa nga nagpositibo sa viral infection ang gipamatay sa OVP.
Base sa inisyal nga imbestigasyon sa lokal nga kagamhanan sa Pilar, usa ka pamilya nga nagdala og baboy gikan sa Manila posibleng maoy hinungdan sa pagkatap sa virus sa maong barangay.
Dugang pa sa local chief executive nga ang mga hog raisers nga apektado sa pagkaylap sa maong sakit makadawat og financial assistance gikan sa gobyerno.
