CEBU – Nasikop sa hini-usang operasyon sa otoridad sa Pilipinas ug sa South Korea ang usa ka Korean National nga gipangita sa South Korea gumikan sa akusasyon nga “fraud”.
Giila ang nagtago-tago nga si Kim Byunggon, 43 anyos, kasamtangan nga nagtener sa dakbayan sa Sugbo human kini nitabok sa Pilipinas aron matod pa magtago sa mga otoridad sa SoKor.
Pinasikad sa gipagawas nga warrant of arrest, nasikop ang langyaw pina-agi na usab sa koordinasyon sa Bureau of Immigration (BI) sa Pilipinas ingon man sa gobyerno sa South Korea.
Nasigpatan si Kim sa Brgy. Apas Lahug dakbayan sa Sugbo hinungdan sa pagka sikop niini subay sa gilusad nga hiniusang operasyon sa kapulisan ug sa mga sakop sa Criminal Investigation Detection Group (CIDG) Regional Field Unit.
Sa datos sa otoridad, nikabat matod pa sa 200 million won o P10 million ang nadispalko ni Kim sa South Korea.
Matud ni CIDG-7 Chief PCol. Ireneo Dalogdog nga gipatuo sa suspetsado ug sa grupo niini nga adunay dakong negosyo ug agnihon ang mga biktima nga mo-invest niini unya layasan matod pa inig kahuman.
Gidala na sa kauluhan ang suspek ug giturn over na kini sa Bureau of Immigration alang na usab sa deportation sa South Korea.
