CEBU CITY-Wala nahimong babag sa usa ka partially blind nga indibidwal ang disability niini aron nga maka-donar og dugo sa gipahigayong blood-letting activity sa Bombo Radyo Cebu sa SM City Cebu karung adlawa, Nobyembre 18, 2023.
Gibutyag ni Felipe Jose Nemer, usa ka partially blind nga 51-anyos nga nagsugod siya sa pagdonar og dugo sukad pa kaniadtong 17-anyos pa siya.
Karun sa iyahang pagdonar og sa Dugong Bombo “Dugong Bombo: A Little Pain, A life to gain” blood donation program sa Bombo Radyo Philippines, nagtimaan sa iyahang kapin sa 30 ka tuig nga pagdonar og dugo.
Isip usa ka regular nga tig-donar og dugo, adunay mga higayon nga ni-donar og tulo ka higayon si Nemer sulod lang sa usa ka tuig.
Subay niini, nanawagan si Nemer ngadto sa mga nagduha-duha sa pag-donar og dugo nga muhinayon gumikan kay dako kini og mahatag nga tabang ilabina sa mga nanginahanglan.
Basi sa labing ulahing datus nga gihuptan sa Bombo Radyo Cebu personell, adunay kinatibuk-ang 275 ka mga indibidwal ang ni-undergo og screening sa kasamtangan, kung diin, 152 niini ang na-lista isip malampusong blood donors.
Ang maong ihap gipanglantawan pa nga musaka gumikan kay padayon sa gihapon ang pag-abot sa mga indibidwal nga buot mu-donar og dugo sa mismong venue sa kalihukan.
