Mikalas og usa ka kinabuhi samtang pipila ang na-angol sa tunga-tungang bahin sa Israel tungod sa pagpamusil nga sumala sa kapulisan usa kini ka teroristang pag-atake.
Nasayran nga usa ka lalaki nga nagpangedaron og 30-anyos ang gipusil ug napatay sa usa ka gasolinahan sa Kochav Yair, samtang 5 pa ka laing tawo sa dili momenos sa tulo ka managlahing dapit ang naangol usab lakip na ang duha nga anaa sa talandungon nga kondisyon.
Sumala sa kapulisan nga ilahang na-neutralize o napatay ang usa ka suspek human nakit-an ang usa ka sakyanan nga gituohan nilang nalambigit sa pagpamusil. Padayon karon nga gisusi sa otoridad kung aduna pabay kaubanan ang napatay nga suspek sa dihang gihimo ang pag-atake.
Nagpahigayon dayon og dinalian nga panagtigom si Prime Minister Benjamin Netanyahu aron masusi ang sitwasyon human sa maong pag-atake.
Samtang gidayeg usab sa Hamas ang maong pag-atake diin ilang gipahayag nga tubag kini sa “nagpadayong agresyon sa Israel batok sa Gaza Strip” ug sa “mga pag-atake nga nasinati sa katawhan matag adlaw didto sa West Bank ug Jerusalem.”
