CEBU – Hilabihan ang kamaya sa University of Cebu Law School human nga 97.4% sa ilahang mga first takers sa bar examination ang nakapasar ug ikaduha ang unibersidad sa Top Performing Law School.
Gibutyag ni Ria Lidia Espina, usa sa mga faculty sa UC Law School, nga usa ka ‘collective effort’ gikan sa administrasyon pinaagi ni Atty. Augusto W. Go, hangtud na sa mga staff ug sa mga tinun-an nga naningkamot arun nga makab-ot ang maong kalampusan.
Matud pa, hilabihan ang ilahang kalipay sa performance sa tinun-an, ilabi na sa mga first takers nga ‘exemplary’ ang percentage sa mga nakapasar.
Mihatag kini ug patimbaya sa tanan, dungan sa pag-ingon nga malipayon ug dakong garbo alang sa kinatibuk-ang UC Law School ang kalampusan sa ilahang mga tinun-an.
Samtang, napanglantawan ni Atty. Glenn Capanas, ang Dean sa College of Law sa University of San Carlos, nga usa ang pag-regionalize sa bar examination hinungdan nga taas ang ratings sa mga nakapasar gikan sa ilahang unibersidad.
Matud pa, posibli nga usa kini sa mga rason gumikan kay daghan ang nalipay ug naghinam-hinam sa maong eksaminasyon.
Apan, giingong posibli usab nga mas naningkamot karun ang mga tinun-an ilabi na ug dugay na kini nilang gipaabot human nga pila ka higayon nga na postponed gumikan sa COVID-19 pandemic ug sa bagyong Odette.
Nanghinaut na lang si Atty. Capanas nga ang mga nakapasar sa bar exam ilabi na sa mga tinun-an sa USC nga muhatag ug libre nga serbisyong legal, ilabi na sa mga legal aid programs sa Integrated Bar of the Philippines (IBP) Cebu Chapter, alang sa mga nagkinahanglan nga dili maka-afford ug pribado nga abogado.
Samtang, nanghinaut usab kini alang sa mga wala makapasar nga dili mawagtangan ug paglaum, ingon man nga mas maningkamot pa sa musunod nga bar exams, ug dawaton kini isip dakong hagit.
